Feb 20

Tapua'i Misa Telefoni i le Faigapalota Aoao a le Atunuu

Honorable Misa TelefoniAPIA: 9 Fepuari 2011: O le aso, na feiloai ai le Afioga ia Misa Telefoni ma le Afioga i le Taitai o le Malo, Susuga Tuilaepa Sailele Malielegaoi, ma faaalia ai e le Palemia e faapea:

"O le a nofo tapua’i i le faiga palota aoao a le atunuu o loma nei i le masina o Mati, 2011, le Afioga i le Laau na Fausia, le Afioga ia Misa Telefoni. O le a le avea ia o se Sui Tauva mo lona Itumalo Fa’aalalafaga e pele ia te ia, o Falelatai ma Samatau, o le paia lava lea i le Aiga Tau Aana ma le latou Tama, le Mamalu ia Falelatai ma le Tula o Salogo. Le paia i le Afio o le Falefa o Usoalii ma le Gafa, Afio o le Tamaitai, le Ma’opu ma Leulumoega. "I le finagalo fa'atamali'i o le Afioga ia Misa, o lona le avea ma Sui Tauva, o le a faatumauina ai pea le maopoopoga filemu ma le fealofani o lona Itumalo, le Itumalo ua iloga lana faaeaea ia te ia i tausaga e tele na avea ai o ia ma o latou Sui i le Palemene o Samoa. E le gata i lea, o le a faapea ona avanoa ai nisi o tamali'i ma failauga o le Itumalo mo le Tofi o le Itumalo i le Fono Aoao Faitulafono o le Malo Tuto’atasi o Samoa."

E tele tausaga o tautua le Afioga Misa i le Palemene o Samoa ma tagata o le tatou atunuu i le avea ai o ia ma Sui Faipule o le Itumalo Fa’aalalafaga o Falelatai ma Samatau. A o avea o ia ma Sui Faipule, sa iloga matati’a maualuluga o tofiga o le Malo sa ia se’ei ai. Sa avea o ia ma Minisita o Faatoaga ma Faigafaiva ma Vaaitau i le Faigamalo a le Afioga Tofilau Eti Alesana mai i le 1992 – 1996. Sa toe tofia foi i le tofiga Minisita o le Soifua Maloloina mai i le 1996 – 2001. O le tausaga e 2001 sa tofia ai o ia e fai ma Sui Ta’ita’i o le Vaega Faaupufai a le HRPP seia oo mai i le tausaga nei, 2011 ma, o tausaga fo’i ia sa ia umia ai le tofi o le Sui Palemia. Ua lauiloa foi le Afioga ia Misa Telefoni i le tele o Tofiga Faavaomalo sa ia umia a o avea o ia ma Sui Usufono o le Palemene o Samoa, e pei o le filifilia ma Peresetene o le Faalapotopotoga o atunuu o Aferika, Karipiane ma le Pasefika ma le Iuni a Atunuu o Europa (ACP-EU).

O nei tofiga uma sa tauave e le Afioga ia Misa i le agaga vilita’i ma le lotonu’u faamaoni ma atagia ai le faatuatuaina o ia e le Vaega Faaupufai a le HRPP ona o lona agavaa ma ona tomai.

Na faaalia e le Afioga i le Palemia lona faanoanoa ona o le a le avea le Afioga ia Misa ma Sui Tauva mo le faigapalota o loo loma nei, ina ua le atoa tupe i le fala ma ua le atoa fo’i nofoa o le sa o le Vaega Faaupufai. Ui i lea, sa feofoofoa’i le Afioga i le Palemia ma le Afioga ia Misa mo ni faamanuiaga e to mai lagi mo le Malo o Samoa a o agai atu i le lumana’i.

Ofisa Sooupu a le Malo

Author: Ofisa o le Malo
Print