The Human Rights Protection Party

What is Good for Apia is also good for Savaii!
"O le mea e lelei i Apia, e lelei foi mo Savaii"

Jan 31

O le faatalanoaga lenei a le Savali ma le Palemia

O le faatalanoaga lenei a le Savali ma le Palemia faatatau i tali a le Malo i fesili na tuu atu i le Malo e le Palemene e ala i lipoti a le Komiti ole Palemene i lipoti a le Suetusi.



Fesili: O loo tuuaia e se tasi o Nusipepa o tali a le Malo na fofogaina i le Palemene i fesili e faalapisia ai lipoti a Komiti ale Palemene ma le Suetusi Sili, o le a sou finagalo?

Tali: Sa faasalalau faalauaitele e leitio a le 2AP felafolafoaiga a le Palemene mo le faafofoga a Samoa atoa ina ia malamalama uma Samoa i tali a le Malo. E 51 tali uumi a le Malo e tali atu ai i fesili uma lava na tuuina mai iā te au ma Minisita o le Kapeneta. Sa faafofoga uma Samoa, e faalua ona talosaga le Itu Agai ua latou talia atoatoa ma le fiafia tali a le Malo. Sa ou teena, teena foi e le Fofoga Fetalai le talosaga muamua ona e ao lava ona faafofoga foi Samoa i tali i fesili ua leva ona faitio ai le Itu Agai i le tuai atu o tali ale Malo. Ao lea ua tali le Malo ae toe vave faauilavea foi e vave faamuta tolaulauga a le Malo, o le toe talosaga lona lua i le ta o le 9 i le po sa matuā faamolemole mai ai le Itu Agai ua matuā manino ma ua faamalieina latou uma i le Itu Agai i fesili i le atoatoa o tali, ae talia ia atoa ia vaega o totoe e lei laulauina, ae faatoa oo lea i le afa o tali e 51 a le Malo.

Sa faafofoga Samoa i lou faamanatu i le maota, o loo fia faafofoga Samoa i tali a le Malo e lē nao le maota o loo fia silafia taualumaga a le Palemene. Sa talosaga pea le Itu Agai ma iu ai ina ou talia le latou talosaga i le va fealoaloai ina ua ou iloa lelei ua le lavāvā le fono, e le tau toe faamatala e au ia itu sa faafofoga lelei mai Samoa i faasalalauga o le fono. O le tau lapisia la e se toatasi alii faatonu o le Obsever nao ia lava e toatasi e atagia ai uiga le anoano, le faaaloalo o lea foi tusitala i Taitai mamalu o le Palemene o sui o Samoa atoa i Aiga ma latouTama faapea le Usoga a Tumua ma Puleono i Salafai. O Samoa o le Ao Mamala, o lona uiga o lea foi ituaiga tagata e soifua ae ua malaia. O telefoni ma feau faasalalau a le toatele o le mamalu o le atunuu ua fesootai mai iā te au i auala eseese, o le faamalo i faamalamalamaga i tali manino a Minisita o le Kapeneta ua malamalama atu ai le atunuu, i le tele o faiga faavae ale Malo maimau e, pea ana lē faalavelave le Itu Agai, o loo fia iloa tali o vaega na totoe. Peitai e maua le avanoa latou te tapā ai tali uma tusitusia mai le Ofisa o le Palemene. E leai lava se faamatalaga o taofia e le Malo, e lē o se aga na a se Malo piopio (corrupt) e pei ona fiafia i ai nisi e laulau pea mai o latou laugutu upu ia, auā e mamā mea i e loto mamā, ae palapalā pea loto o e manatu foi faapena , o le isi muāgagana o se mea e suamalie i le isi tagata ae ose mea oona i le isi.  E lē mafai, lē mafai ona faamalie e le Malo tagata uma.

Fesili: O le a lou taofi e faapea o loo lē amanaia e le Malo lipoti a le Sue Tusi Sili ?

Tali: O le faamaoniga lena o le vaivai tele o lea tuuaiga le mafaufau o le amanaia lena o le lipoti a le Sue Tusi Sili, o le saunia lelei o Tali Tusitusia ia e 51 na faalauiloa aloaia mai totonu o le Palemene e le Itu Agai ua latou talia ma loto malilie i tali a le Malo, o le tāua lena o le faasalalau i le leitiō o fefaaaliaiga o taofi e sui o le Palemene, e lē toe mafai ona toe oole e se faipule poo se Nusipepa upu tonu na fai i totonu o le Palemene. E tupu soo foi uiga ia o le saunoa  i le Palemene ose faipule ae toe oo mai i fafo o le Palemene a Samoa, ese upu e fai i le Au Tusitala ma faasese atu ai lava ma latou e lei faalogologo i leitio i upu tonu na fai i totonu o le Palemene a Samoa. O le tau faasese, pepelo ma le faagutugutulua le tau o uiga na, ma tifato ifo ai i lalo le aloaia o se faipule o le Palemene na olegia le atunuu. O le Ofisa lea o le Suetusi ua matuā faatoateleina e le Malo i latou suetusi agavaa e sueina vaega eseese o le Malo ina ia atili tuuitiitia ai uiga le amiotonu e ono afaina ai le sologa lelei o atinae a le atunuu. E lē ese la le faamoemoe o le ofisa o le Suetusi Sili, ese le faamoemoe lelei o Komiti o le Palemene, le Palemene ma le Malo.  E tasi lava le manatu ia faaleleia le tautuaina o le atunuu.

Fesili: O le a sau faamalamalamaga o le 10 pasene retention ma le 10 pasene withholding tax lea foi e tāua i le lipoti ?

Tali: E uiga tutusa lava mea na e lua.  O tupe lava a se kamupani o taofi faamalosia e le Malo, e ono faaaoga faamalosia e le Malo mo le totogi ai o se mea o faaletonu (10 pasene retention) poo se lāfoga foi ua ova le telē (withholding tax). Ao tupe lava o le kamupani, e le o se tupe ale Malo. Faataitaiga, afai o se auala e miliona tālā le tau, ona taofi faamalosia lea o le $100,000 ele Malo sei uma le tausaga pe lelei le auala, afai e uma le tausaga o loo lelei pea ona faafoi lea o le $100,000 i le kamupani. Tele lava o galuega e toe faafoi lava le $100,000. Ona o loo unai malosi e le Malo kamupani e tauva e taugofie ai i le Malo, o le ala lea e talosaga ai i le tele o kamupani le ioega e tatala latou tupe ona ua pagatia le kamupani i le itu tau tupe. Aemaise o se atunuu o loo tau atinae ana pisinisi. E vaivai le tele o Konekarate e mafua ai ona fai ma fai le fesoasoani lea o le tala i tua i le uta fetāla᾽i, i le tulafono o le uta fetāla᾽i o le uta lena a le poto, ao le taofiofi mamau o le uta lena a le vale saupau. Ae ao i le Minisita ona silasila poo le a le tulaga o i ai le galuega poo lelei faatino. E faalagolago i ai se iuga mo le tala i tua ose vaega o le 10 pasene retention. Pe ana tausisia le taofi mau, penei nao se tasi pe lua se konekarate fai auala i Samoa ma taugatā ai tau o galuega o le Malo. O le faasao o le sene e tasi ae gau aano i le miliona tala, e ao ai ona fetuutuunai le faautautaga tatau.

Fesili: O loo tuuaia foi le Malo e faapea o taimi uma lava e faitioina ai le Malo, ona tou lalafi lea i tua o le Tusi Paia, E sao lea tuuaiga ?

Tali: O le atunuu lenei e lua poutū tetele o loo faavae ai lona Malo, oTalitonuga faa Kerisiano ma Tū ma aganuu a Samoa.  Sei vagana la o se Samoa e palaai ma uiga faapaupau toe fia palagi, nate faia lafoga lē mafaufau faapena. Ae o le faapogai o manatu na, ia aua ai nei manatua e tagata kerisiano o loo faataua Nusipepa ia, tuuaiga le mafaufau ia o loo fai, o uiga leaga uma ia e lē ogatasi ma le faakerisiano, o uiga fiapoto ia, taufaaleaga tagata, o le molimau pepelo ma le faavevesi atunuu. Ua faafia ea ona faasala e le Faamasinoga Nusipepa ia ona o le faaleaga tagata?  Ae ua faafia ona faatoese faalauaitele Nusipepa ia i le atunuu ma tatou faitau uma ai? E le ni upu la tau faaoleole lea ou te tali atu ai. O upu o mea moni e tutupu ae galo gofie i tagata faitau pepa(historical facts.)

Fesili: O le isi tuuaiga matuiā tele o le le mafai ona talanoaina tali a le Malo. O le a sou finagalo i lea mataupu?.

Tali: Ose manatu faavalevalea tele. O ala o galuega faa-Palemene i tulafono tumau o le Maota, o lipoti a Matagaluega a le Malo e faataatia i le Palemene ona tuu atu lea i le komiti latou te suesueina, e matuā tele aso ma masina e faatalatalanoa ai ma Matagaluega a le Malo o Faauluuluga ia o loo gafa ma le faatautaiga o galuega e malamalama lelei i taualumaga o le Malo, a fia feiloai foi le komiti ma le Minisita e leai se mea e taofia ai le talanoa ma le Minisita. Ua silafia foi e komiti au faatonuga tusitusia i Ulu o Matagaluega ia matuā faaavanoa taimi e oo ai i luma o komiti e faamalamalamaina mafaufau o loo fia silafia e komiti o le Palemene. O loo malamalama foi nisi o Taitaifono o ia komiti i au faatonuga ia. E leai, leai, leai  se faalafia e le Malo. A foi atu la lipoti nei ale komiti a le Palemene i le Maota mo felafolafoaiga e aofia ai ma fautuaga, o le taimi lena o felafolafoaiga ma fefaaaliga o taofi e Faipule uma o le Maota. I le tauaofiaga talu ai, sa ou faaalia i totonu o le Palemene, ua ono vaiaso o tuu atu i le maota le Tala Faaopopo o le Tupe e faitau manino ai. Ao le uluai lauga lava a le Itu Agai i le Tala o le Tupe $8 miliona, ae ou faalogo atu o saunoa mai,  “O le tala o le tupe lenei e sefulu ma ona tupu miliona tala,” lea na ou tū atu loa faasao, o le uiga o le faamatalaga, o le faigata o loo feagai ma le Malo o le taumafai lea o le pito laau o le atinae o le atunuu, toe tele taimi maumau e tau faamalamalama ai auala masani faafaigofie e faafoe ai le Malo.

Fesili: Faapefea le manatu, e le gata ai i le Palemene mataupu a le Palemene, e ono molia e se Komiti le Palemene i le Faaamasinoga?

Tali: Ua uma ona alo le ogāsami lena e le Palemene o Samoa. Na molia foi e le isi Faauluuluga o le Malo le Palemene i le Faamasinoga ona o le auala foi na tagofia ai e le Palemene le isi lipoti i le Palemene ae lē fiafia ai. O le iuga a le Faamasinoga e pule lava le Palemene i le mea e fai. A pasia loa e le Palemene se lipoti o le mea totino lena a le Palemene e pule ai foi le Palemene i le mea e fai. O le tulaga taualoa lena a le Faamasinoga , ma e le aiāina  e le Faamasinoga mataupu ale Palemene.

Faafetai atu i lau Afioga i le Alii Palemia mo le faaavanoaina o lou taimi ma ua uma ai foi ma fesili a le Savali.

Author: Savali
Print PDF

HRPP © 2011 - 2016. All rights reserved.