The Human Rights Protection Party

What is Good for Apia is also good for Savaii!
"O le mea e lelei i Apia, e lelei foi mo Savaii"

Mar 04

Anavatau a le HRPP

ANAVATAU A LE VAEGA FA’AUPUFAI E PUIPUIA AIĀ TATAU
A TAGATA MO LE FAIGĀPALOTA LAUTELE O LE 2011

UPU TOMUA:
I le tapenaina o le Anavatau lenei, o lo’o fa’ata’oto atu ai fuafuaga mamao a lenei Vaega Fa’aupufai mo le 5 Tausaga, pea toe filifilia e fa’afoeina le Sa o Samoa i le mae’a ai o Faigā Palota Lautele o lo’o loma nei.  E ao ona silafia o atina’e o lo’o fa’atino i le taimi nei, e fa’aāuāu pea.  E lē o se faigamalō fo’i o tau fa’ata’ita’i.  O le faigamalō lenei, ua matua ma ua lava tāoso i pulega malō.

O le HRPP, na filifilia e le atunu’u mai lava i ana Faigā Palota Lautele soso’o e Fitu i le 1982, 1985, 1988, 1991, 1996, 2001, 2006.  O le ā le uiga loloto o le taunu’uga o nei faigā palota a le atunu’u?  O le fe’au o momoli mai ai, o le fa’atuatuaina pea lea o le HRPP e tu i le foe o le Sā o Samoa.  Ae fa’avae lea fa’atuatuaga, i galuega fa’atino mo le manuia lautele o le atunu’u.  O lana manulauti Ta’iala “O le mea e lelei i Apia, e lelei fo’i i afio’aga i tua,” o lo’o ta’ui ma afifī malu ai, le agaga maualuga o atina’e uma o lo’o fa’atino nei, e aga’itonu i le si’itia o le soifuaga auiluma o tatou tagata lautele.

O fuafuaga fo’i o aveatu I lenei Anavatau, o fuafuaga ua mae’a lauiliuina i itū uma lava o le fa’atāua i lo tatou soifua o aso uma, ma gafataulimaina i lo tatou malosi tau seleni.  E lē o ni fuafuaga la so’ona fai ma le lē fa’autauta e avea ua na o ni fa’atosina auā le faigā palota.

O galuega fa’atino, e fa’asilisili pea lava pea nai lo folafolaga. Ua lava fo’i fa’ailoga va’aia o galuega fa’atino e faigamalō uma a le HRPP i Paea’iga ua tuana’i e fa’amanatu ai pea le sao o le HRPP i le atina’e o Samoa. Po’o le ā lava la le tāua o mafaufauga o lo’o aveatu i lenei Anavatau, e lē aogā atoa mo le lumana’i manuia o fanau pe a fa’atamala ona fai le filifiliga e ala i le palota.  Ma e nao le lua lava filifiliga e fai i le Faiga Palota lenei.  O le filifiliga e fa’avae i le Vaega Fa’a-Upufai ua mautinoa ana polokalame o atina’e e manuia ai Samoa; ma le Vaega e taumate so latou sao.  Auā a leai se taeao e mafai ona fa’amasinoina ai le fa’atuatuaina o latou fuafuaga,  pau le Ta’iala o lo’o totoe, o le silasila i foliga o latou o lalāmua ai ma fesili ifo – o ni tagata ‘ea e talitonuina?  O ‘i’inā o lo’o molimoli manino mai ai le tali.

E sili le manu mautinoa e tasi o lo’o tu lima, nai lo manu e lua sesegi i le vaomatua.  Pe a faasola le manu na Tu lima, ona o le naunau e sa’ili manu e lua i le vaomatua, e i’u ane, ua lē manu e lua, lē manu na Tu Tula Tu Lima, ae ua na’o le fola lima.  O le Faigā filifiliga o le a alofaiva i ai Samoa, o le filifiliga sa’oloto i le ‘auala i le lumanai mautinoa, ma le lumanai e lē o mailoa.

‘OTO’OTOGA O MEA TUTUPU MA MATĀTI’A
‘AUSIA I LE PAEA’IGA 2006 – 2011

Afai tatou te fia iloa le taunu’uga I le lumana’i, matau lelei ma fa’autagia mea na fai ma mea na tutupu i Aso ua Tuana’i.  Aua o mea na tutupu e ono toe tutupu foi.  O upu ta’iala tāua ia e f’aamanatu mai pea e i latou o lo’o i ai le tomai i Talatu’u o mea Tutupu i le lalolagi.
E le’i folaulau i le laufau malū le Paeaiga na fa’ato’ā mavae atu nei.  E 6 lu’itau tetele na fa’afeagai ma le Malō mai lava i le amataga o le Paeaiga:

  • Tu’umalō o le Ao Mamalu o le Malō le Susuga i le Tapa’au Fa’asisina ma le filifilia o lē e Sui Tulaga i lenei tofiga mamalu o le Malō.  E lē o se fa’ai’uga e faigofie
  • Fausia o Fale ta’alo, Malae Ta’alo o ‘auala tetele ma ‘auala simā/laupapa ia sologa lelei ai femalagaina auā Taligamalō a Samoa i Ta’aloga o le Pasefika.
  • Suiga o le itu auala e faimalaga ai Ta’avale afi mai le itu taumatau i le Itu Tauagavale ma galuega so’oso’o tau’au i fa’ailo auala talafeagai saogalemū.  Na matuā so’ona vevesi ai i latou ua leai se fa’atuatua.
  • Lūlūina o le mafui’e tele na fa’apogai ai galulolo o le Tsunami ma maliliu ai le to’atele o tatou tagata.  Sa fa’atama’ia ai le tele o atu fālega ae maise mea totino a le Malō.
  • Tapunia o le Tele o Faletupe, Fale Faigaluega, ma Fale gaosi oloa na masofa ai le fa ma lutia ai i Puava Tamāoaiga o atunu’u uma o le lalolagi na matuā a’afia ai lava ma tupe maua a Samoa.
  • O le tau fa’asoasoa o seleni ‘uti’uti a le tatou Malō e tau fa’afea’uta’i ai le mau mana’o ae o lea fo’i o fa’agasolo si’itaga maoa’e o Totogi o le aufaigaluega uma a le Malō i le 3 tausaga soso’o e o’o mai nei lava o lo’o fa’aseā ai pea le to’atele o latou o fai latou atina’e tau pisinisi ua a’afia tele ai latou fo’i Taumafaiga.
  • O a’afiaga uma nei, e i ai fo’i lo latou sao ogaoga i le fa’atinoga o fuafuaga fa’ata’oto’oto a lo tatou Malo.  Auā e fa’alavelave ma seseu ‘ese ai mafaufauga, o taimi tāua, ma le tele o seleni a le Malō e a’afia ai.  Na fa’apefea ona tali le Malō? O le laolao lelei lenei se’i toe tepa taula’i ai i tua le atunu’u i galuega sa fai.

Faamanatuina o le Fanau o le HRPP i Aukilani Niusila i le 2009, na faia ai lenei ata faapitoa mo le aofaiga o le alualu i luma o Samoa tutoatasi.


Tamaoaiga Lautele:
I le va’aiga i le āoāotetele, sa sologa lelei ma tuputupu a’e malie le Tamaoaiga o Samoa i le 5 Tausaga talu ai.  Lea ua ‘ausia nei le $1.5 piliona talā o tupe maua tu’u aofai ia a le atunu’u i le Tausaga (GDP) O se si’itaga maualuga lea mai le $1.1 piliona talā sa i ai i le amataga o le Paea’iga.  A fua i le fuaitau aofa’i o tatou tagata, ua ‘ausia ai e Samoa se fuafa’alaugatasia e $8000.00 a le tagata i le Tausaga (per capita Income)  O le fa’apogai lea o le si’itia o Samoa e Malō ‘Aufa’atasi e avea o se Malō ua atia’e, e amata fa’amamalu i le 2010 ae ona o le Tsunami ma ona a’afiaga ogaoga, o lea ua toe tolo ai i tua le aso fa’amamalu i le 2014.

Pe a tepa taula’i fo’i i Matāti’a Fa’atulagaina o atina’e o le mileniuma o lo’o tulimata’i e Malō o le lalolagi mo Atunu’u taito’atasi, o lo’o tulaga lelei ai fo’i Samoa i le fa’atinoina ao le’i aulia le 2015.  Aofia ai i ia matāti’a fa’atulagaina a’oa’oga mo fanau uma, tu’uitiitia o le maliliu o Tinā ma’itaga ma pepe fananau i le aso e ola ai, ma le tete’e atu i fa’ama’i pipisi ma isi fa’ama’i mata’utia o lo’o ma’imau ai le soifua o tatou tagata.

I le faatautaiga ma le fa’autauta o polokalame o atina’e ‘ese’ese uma nei o le mileniuma, faatasi ai ma polokalame o le puipuiga o le siosiomaga, e tapenapena ai Samoa i suiga o le tau, o gaoioiga uma ia e talia gofie ai e Fa’alapotopotoga ma Malo o le lalolagi o tatou faamoemoega uma e aumai i ai le latou lagolago e ala i fesoasoani ‘ese’ese o lo’o tatou ‘ae’ae ai pea i lea tausaga ma lea tausaga.

Soifua Malōlōina:

  • Tu’u mavaevae fa’aāuāu o le pulega, o le soifua malōlōina mai le Vaega o Tautua fa’afoma’i ma Tausi Soifua, ina ia fa’asoa tatau ai ‘au’aunaga ‘ese’ese mo’omia i Falema’i uma o le tatou Malō.
  • Amatalia o le polokalame e fa’atupe e le Malō e totogi ai foma’i o lo’o fai ā latou lava pisinisi, e asiasi atu i Falema’i i tua mo togafitiga mo’omia.
  • Ua fa’agasolo nei fa’aāuāu polokalame o le Puipuiga mai fa’ama’i e pei o Tui Puipuia mai fa’ama’i ‘ese’ese ma le fa’atuina o Fa’alapotopotoga Fa’amalositino i alalafaga i tua.
  • Aloa’ia fa’a-va o-Malō o le tatou Univesite Fa’afoma’i mo le a’oa’oina o ā tatou lava tama fanau i le tomai fa’a-foma’i e fa’amalieina ai ō tatou mana’oga ina ia lava le ‘au’aunaga fa’a-foma’i mo tatou tagata lautele.
  • A’oga:
  • Fa’amalosia fa’ale-tulafono le a’o’oga o fanau, lea fo’i ua totogi ma pili o A’oga i le lagolago mai o pa’aga a le tatou Malō.
  • Si’itia atili o a’oa’oga mo Tomai i matātā ‘ese’ese e taua’ao ai tusi Pasi a Ausetalia i Samoa nei i matātā ‘ese’ese o lo’o a’oa’oina ai.  E maua vave ai galuega totogi lelei pe a faimalaga e nofo mau ai i atunu’u i fafo.
  • Si’itia o Fesoasoani i A’oga a Ekalesia ma isi A’oga i Tua i le $5miliona talā i le tausaga.
  • Amatalia o polokalame e fa’aaogā ai masini computers i a’oga i tua.
  • Fa’ato’aga ma Faigāfaiva:
  • Ua mae’a fa’amatu’u i tua mamoe o Tau vevela mo le amatalia o ia fo’i itūaiga Fa’ato’aga Lafu manu i Samoa.
  • Amatalia o le polokalame fou o le toe totōina fa’avāvā ta’i tolu o la’au totō filifilia mai le koko, kofe, niu, avoka, tipolo etc., e fa’aaogā tatau ai ‘ele’ele i se faiga fa’aponesi ma o lo’o fua fa’atatau fo’i le polokalame i le to’agaogao o aiga ua i ai nei ma o lo’o agava’a ai na o latou e lē o toe fa’aaogāina ni vaila’au e ‘o’ona ai le ‘ele’ele (Organic Farming)
  • Amatalia o le “Talomua” e maua gofie ai taumafa o aso uma ma una’ia ai le Totō o le ituaiga o talo ua maua nei e agava’a mo maketi i fafo.
  • Gaosia o le falaoamata Samoa, Suau’u Tiso Samoa, e ola ai ta’avale ma afi ‘eletise, ma o lo’o galue nei fo’i le tatou Fale Su’esu’e Fa’a-Saienisi (SROS) i le gaosia o le suāu’u Samoa fai meaa’i mai le avoka, ma isi lava su’esu’ega fa’a-saienisi mo oloa ‘ese’ese e gaosi i Samoa.
  • Tatala le maketi fou o I’a ma le Uafu o Va’a Fagota i Savalalo na fa’atupe e le Malō o Iapani.

Polokalame lagolago i atina’e o Fa’ato’aga

  • Fa’aāuāu polokalame o le valitāina o ‘Auala galue, toso i ai ma le ‘eletise ma le vai e atili fa’amāmā avega i le tau o le soifuaga ona ua fa’afaigofie ona nofoia ma fa’ato’a e aiga o latou tuā-maota.
  • Fa’aāuāu Polokalame o le fa’aulufale mai o ta’avale afi ma masini tau fa’ato’aga taumatau foeuli e fa’afaigofie atili ai fela’uaiga o uta mai fa’ato’aga mo le maketi
  • Fausia o le maketi tele i le ‘a’ai fou i Salelologa, fa’apea le maketi fo’u i Vaitele e tu’uitiitia ai le fa’atumutumulia o le maketi i Fugalei.
  • Polokalame o ‘auala tetele ma auala Galue:
  • Mae’a fausia o malae Ta’alo, ‘auala tetele ma ‘auala laupapa/simā tu taulaga auā taligamalō o Ta’aloga o le Pasefika i le 2007.
  • Fa’amae’a polokalame o nisi o auala tetele, auala galue, taligalu ma talivai na gafatia mo Upolu ma Savai’i ona o le fa’aluafesasi o le polokalame i fa’afatiātama’i na a’afia ai le atunuu i le Paea’iga talu ai.

 

Polokalame lagolago i atina’e autū:

  • Ua amatalia nei se atina’e tele e gaosi ai le eletise mai ave o le la e se Kamupani tuma’oti.
  • Ua mae’a le atina’e tele o le vai taumafa na fa’atupe e Malō o Europa mai Palauli i Fa’asalele’aga ma Faleata agai atu i le itū matū Sisifo o Upolu.
  • Ua mae’a ona fausia ‘auala felavasa’i i le Taulaga Fou i Salelologa i le ‘ele’ele o tu ai nei e fa’apei ona malilie ‘autasi i ai le Afioga iā Luamanuvae Eti Alesana ma Ali’i ma Faipule o le latou nu’u o Salelologa, ua mae’a vaevae fo’i poloka mo pisinisi ‘ese’ese.  Ua uma fo’i ona umusā le Maketi ma ua nofoia fa’asolosolo e i latou e amatalia ai latou pisinisi.
  • Ua mae’a fausia le uafu i Aleipata ma ua fa’aaogā nei mo femalagaina i le va o Samoa ma Amerika Samoa.
  • Lea fo’i ua amata fa’aaogā le Va’a Fou e suia le M.V. Lady Samoa II ina ua taunu’u mai i le tausaga talu ai.

ISI ATINA’E LAUTELE - UA MAE’A FA’ATINO

  • Mae’a ona toe fausia atoa le Malae Ta’alo ma Fale Matamata i le Malae Tutu’u fa’atupe e le Malo o Saina
  • Ua amata fo’i ona fausia le Malae Lakapi Ta’alo Fou Fa’a-va o-Malō i Tuana’imato fa’atupe e le Komiti o Pulega o Lakapi a le Lalolagi
  • Mae’a fausia le Maota o Fa’amasinoga i Mulinu’u e malu puipuia ai I’uga o Fa’amasinoga o āiā tatau i Suafa ma ‘ele’ele fa’aleaganu’u.
  • Fa’amalosia falelalaga a matuau’u ma le ‘au-se’epapa, e toe lalaga fa’ato’aga ai Ie o le Malō e memea ma onomea ai le fa’alupega – o measina a Samoa ina ia tapenapena ai Aiga mo latou fa’alavelave fai.
  • Mae’a fausia le nofoaga Autū fou o Leoleo i Apia e maua ai se si’osi’omaga mamā e fa’atupu ai le naunau galue fa’apea fo’i ma le fa’atu o le isi nofoaga fa’apitoa i Mulifanua mo tupulaga talavou solitulafono e toe fuata’ina ai le ola fa’afouina.
  • Mae’a tosoina laina o feso’otaiga tau-uaealesi e ta’i ā lalo i le ta’ele o le Sami.
  • Mae’a fausia e le Malō o Saina o Ofisa fou mo Sui a Faipule o le Palemene i Mulinu’u.
  • Mae’a teuteu le Tulafono Fa’avae e fa’amalosia ai Faiga Vaega Fa’a-Upufai e auala i le toe faagafua o nofoa i le Palemene o sui femoumoua’i faitogafiti, suisui patī, i totonu o se Paea’iga fa’a-Palemene o se faiga fa’avae e fa’atupu ai Faigamalō maopoopo, filemū ma le lē fetuatuana’i ma aga’i tasi ai le fa’amuamua i le atina’e o le soifua lelei o le atunu’u.

 

Penisione o Tagata Matutua:
E $16,000,000 le tupe alu i le Penisione i le tausaga i le taimi nei ma o lo’o si’i pea i Paea’iga uma ia talafeagai ma le malosi tau tupe o le Tamāoaiga.

Totogi o tagata Faigaluega:
Ua i ai le Komiti Fa’apitoa e fuafuaina totogi o le ‘aufaigaluega uma a le Malō o lo’o galulue fa’aāuāu e fautua si’itaga mai lea taimi i lea taimi i le maualuga o lo’o talafeagai ma fesuia’iga o le tau o le soifuaga ma le malosi tau tupe o le Malō.  E fa’apei fo’i ona fa’atinoina ai si’itaga tetele o Totogi i le tolu tausaga soso’o o le Paea’iga lenei fa’apea fo’i si’itaga o lo’o fa’agasolo i lenei

Tausaga Fa’a-le-tupe. O le ‘autū o le fa’amoemoe, a fuafua si’itaga, ia aofia uma lava tagata faigaluega i so’o se itū tino o le Malō ina ia vasaga lelei ai pea totogi o Vaega ‘ese’ese o le Tautua Malō.  O le itū tāua ia ‘aua ne’i i ai se faiga fa’apito ma le fa’aitū’au.

FUAFUAGA MAMAO O LE ANAVATAU 2011 – 2015 A LE
VAEGA FA’A-UPUFAI O LE HRPP E FINAUINA AI
LE FAIGA PALOTA LAUTELE O LE 2011

UPU TOMUA:
E anoano polokalame fa’aaāuāu o atina’e a le Malō e lē toe tau au’ili’iliina ona o le fa’amoemoe e ‘apo na’o le muia’a e fa’ama’alo i’u’ofe ai le atoaga.  E fa’apei la o polokalame uma mo le ‘ausia o matāti’a fa’atulagaina o atina’e o le mileniuma fa’apea polokalame o le toe fuata’ina o le soifua galue o le ‘aufaigaluega a le Malō e una’ia ai le fa’atinoaga o tiute i auala pito silisili ona lelei.  O gaoioiga uma ia fa’aāuāu e lagolagoina Vaega ‘ese’ese o le a au’ili’ili atu fa’asolosolo.  O le taunu’uga fa’ai’u fo’i o nei polokalame uma, o le si’itia lea o le soifuaga āuiluma o tagata lautele.  E mafai ai ona tatou tali atu i mana’oga ‘ese’ese o le soifua o aso uma.  Ae o le ōi i le tau o le soifuaga, o lenā o lo’o iā te ‘oe le tali e fa’aaogā tatau ai avanoa e tele ua saunia e le Malō ma le lasi o fa’amanuiaga foa’i fua mai e le Atua iā i tatou i aso uma i ‘auala ‘ese’ese i le lau’ele’ele ma le sami e maua ai taumafa e tele o la’au fua-fuata  ma fua fa’alausoso’o ina ia leai seisi i Samoa e oti i le fia Taumafa.

A’OA’OGA MA LE SOIFUA MALŌLŌINA:
E ō fa’atasi le fa’atāua o atina’e o le ola a’oa’oina ma le soifua malōloina.  Aisea?  A lelei a’oga, o le ki lenā o le lumana’i manuia o so’o se tagata soifua.  E matalatala uma ai faitoto’a u’amea i so’o se matāfaioi i le lalolagi lenei o lo’o tatou ola ai.  Peita’i, a I’u le A’oga ua maua se fa’ailoga o se atali’i ae laveia loa i se ma’i ma  maliu ai, ua lē aogā atoa le a’oa’oga na maua.  A lelei fo’i le soifua malōlōina ae lē ao’ao’ina, o inā e fanau mai ai le amio lē taupulea.  O itu ia e tu’u atu ai pea le fa’atāua i Fuafuaga mamao tofilua i A’oa’oga ma le Soifua Maloloina.

A’OGA:
O le Fa’amoemoe autū: Ia popoto fanau uma a Samoa.

A’oa’oga a le Malō:

(a)    A’oa’oina ia lava faia’oga mo matā’upu uma e tatau ona a’oa’oina i      
a’oga Tulaga Lua ma Kolisi uma a le Malō.
(e)    Fa’aauau le polokalame o le totogiina o pili a’oga o fanau a’oga i A’oga Tulaga Lua ma A’oga Maualuluga.

(i)     Fa’aāuāu polokalame o fesoasoani fa’apitoa mo a’oga a fanau lē atoatoa le malosi o le tino ma le mafaufau.
(o)    Fa’aāuāu le polokalame mo a’oga ia tofutofusia le tamaititi a’oga ma le
masini Komepiuta ma fa’aa’ogāina ai loa Komepiuta i a’oga uma i Samoa.
(u)    Fa’aāuāu polokalame fa’asolosolo o lo’o galulue so’oso’otau’au ai   le
Malō ma ana pa’aga mo le fausia o Falea’oga mautu i Nu’u i tua.
(f)     Fa’atuina o a’oga fa’aāuāu mo latou ua matutua ae o lo’o mo’omia pea
le fia a’oa’o i so’o se tomai e toe fa’aaogā ai o latou tagata.
(g)    Fa’aāuāuina o polokalame tau sikolasipi mo fanau a’oga mo   
Fa’ailogaTikeli Muamua, lē gata i Univesite i atunu’u i fafo, ae fa’apea   
fo’i ma le NUS, Univesite i Alafua, ma le Univesite Fa’afoma’i i  Moto’otua.
(l)    Si’itia fa’a-Kolisi A’oga maualuga o lo’o totoe ia amata ma fa’ai’u ai
lava i Nu’u i tua a’oa’oga a fanau i lalo o le va’aiga malu a matua

A’oa’oga i Tua: Si’itia fa’asolosolo fesoasoani tau seleni mo a’oga a Ekalesia ma a’oga amata.

SOIFUA MALŌLŌINA:
Tumau le fa’amoemoe autū o polokalame ina ia :

(i)    Vave le togafitia o so’o se gasegase ia taofia vave ai le sosolo o le mai ma toe fa’afo’isia vave ai le malosi fa’afouina o lē o gasegase.
(ii)    Fa’atino ‘auala uma ‘ese’ese e puipuia ai le soifua mai le a’afia i so’o se ma’i.

Togafitia o gasegase:

(a)    Fa’atulaga se polokalame fou ma atoatoa mo le togafitia vave o gasegase fa’atasi ai ma le fa’a’auupegaina  fa’asolosolo o tatou Falema’i i masini ‘ese’ese mo’omia mo le atoatoa o le tautua e faatino lava i Samoa e o tatou lava foma’i ua lava a’otauina i so’o se matātā fa’a-foma’i ae fesoasoani i ai ma fomai fa’apitoa mai fafo e faia Ta’otoga i Samoa  nei ma lē toe ‘ave ai ni gasegase i fafo.  E matuā mo’omia ai fo’i le i ai uma o foma’i poto fa’apitoa i so’o se lālā o le ‘au’aunaga fa’afoma’i e avea o se manulautī autū mo le paea’iga fou. 
(e)    Fa’aāuāu polokalame o le fa’aogāina tatau o foma’i mai tua mo le
asiasia ma le togafitia o gasegase i Falema’i uma o le Malō ma
Itumalō.
(i)    Fa’aāuāu polokalame mo le fa’alauteleina atili o le tomai ma le agava’a o foma’i ma tausi soifua e ala i avanoa tau    a’oa’oga fa’apitoa mo i latou ia i Falemai i atunu’u i fafo.
(o)    Fa’atuina ma le fa’amalosia o se polokalame fou mo le va’aiga fa’aāuāu fa’apitoa o gasegase tugā  ua leai se fa’amoemoe e toe fo’i ai i le malosi masani sa i ai muamua (palliative care).
(u)    Fa’aāuāu ma fa’alautele polokalame mo i latou o gasegase i le gasegase o fatuga’o i le fa’atuina lea o seisi Fale mo gasegase o fatuga’o i le motu tele i Salafai.

Puipuiga mai gasegase:

(a)    Fa’amalosia o polokalame fa’alauiloa o auala e taofia ai fa’ama’i oti o lo’o fa’aumatia ai le soifua o le to’atele o tatou tagata (NCDs) ona o taumafa lē tatau e pei o le Toto maualuga, ma’i fatu, itūaiga uma o Kanesa, ma’i suka, gasegase o mata, fa’alētonu o le mafaufau, ma’i ate, ma gasegase o fatu ga’o
(e)    Fa’amalosia o tui Puipuia mai fa’ama’i ‘ese’ese e galulue fa’atasi ai ma Komiti Tumamā o afio’aga ma alaalafaga.
(i)    Fa’amalosia ma Fa’aāuāuina polokalame tau fa’amalositino i totonu o Nu’u e agai tasi i le fa’aitiitia o le mamafa o le tino, fa’atasi ai ma le una’ia o tatou tagata e Siaki fa’alua i le Tausaga e foma’i lo latou soifua e vave iloa ma vave togafitia ai se ma’i fa’ato’ā amata a’afia ai.

FA’ATO’AGA MA FAIGĀFAIVA:
O le fa’amoemoe autu:  Ia lava taumafa o aso uma e tu’umāmāina ai le tau o le soifuaga.  O le taunu’uga lea o le poloaiga o le foafoaga – E maua taumafa i le āfu o mata.

(a)    Fa’aāuāu le polokalame o le “Talomua” ma le totōina fa’aponesi o lā’au totō e 3 - filifili mai le Niu, koko, kofe, avoka, tipolo ma isi e fa’aaogā tatau ai le ‘ele’ele e gafatia gofie e se ‘auaiga to’aitiiti toe lē fa’aaogā ai vailā’au o’ona.  O se polokalame e maualuga ai tupe maua mai oloa e ‘auina atu i fafo toe puipuia ai le si’osi’omaga.
(e)    Toe una’ia malosi o lafu manu ‘ese’ese e pei o moa, pua’a, mamoe ma povi ma fa’aaogā i ai masini fasi manu fe’avea’i e 2 (mo Upolu ma Savaii) e fa’atupe e le Fale Tupe o le lalolagi.
(i)    Una’ia o isi itūaiga Fa’ato’aga fou o la’au totō e pei o tipolo, avoka etc. ma fuālā’au ‘aina ‘ese’ese e suisuitau’au i to’aga fa’avae masani e saili vave ai tupe maua.
(o)    Fa’aāuāu polokalame o le fa’asao a nu’u mo le fa’afofoa o figota mo le tufatufa atu i Nu’u latou te toe fa’aolaola i ō latou gataifale mo le fofoga taumafa.

ATINA’E TETELE AUTŪ E FA’ALAGOLAGO I AI ISI ATINA’E
(INFRASTRUCTURAL DEVELOPMENT)

Eletise:
O le fa’amoemoe autū, Ia maua gofie le malosi ‘eletise i le Tau e gafatia e tagata uma.

  • Fa’amae’a o le fa’atuina o masini tetele gaosi eletise i le nofoaga fou i Aleisa e mamao ese ma atu falega ona o le pa’ō
  • Fa’aauau o le polokalame o le gaosia o le eletise mai le la i le faamoemoe e taofia ai le siitai o tau o le eletise i le lumana’i e afua i le taugatā o le tiso suāu’u mai le manava o le eleele
  • Fa’aauau su’esu’ega i isi auala o loo maua i Samoa e gaosi ai le eletise fa’afouina
  • Vai taumafa:

O le fa’amoemoe autū ia mamā, saogalemū ma maua gofie le vai i le 24 itula o le aso.

  • Fa’aāuāu polokalame o le ta’iina po’o le viliina o le suavai taumafa mo afio’aga uma lava ae maise Nu’u e oge vai.
  • Fa’aāuāu  polokalame mo le vaimamāina o le vai ina ia saogalēmu mo le taumafa e aiga uma o Samoa ma ia maua gofie I so’o se taimi o le aso.

Telefoni ma uaealesi:
O le fa’amoemoe autū, ia faigofie ma taugofie feso’ota’iga tau telefoni mai so’o se tulimanu o Samoa

  • Fa’amalosia polokalame mo tauvaga tutusa o Kamupani Telefoni ia lelei atoatoa le tautua i so’o se alaalafaga ma ia taugofie mo tagata uma.
  • Tosoina o uaea i lalo o le sami ia fa’aopoopo ai pea laina fou mo feso’otaiga televavave tau uaealesi mo’omia i so’o se atunu’u o le lalolagi ia maua ai pea e Samoa mau avanoa e tele mo pisinisi ma galuega e fa’alagolago i feso’otaiga vavave tau uaealesi i atunu;u o le lalolagi (Tourism, Offshore Centre, Call centers, Distant education, Tele medicine etc)


Auala:
O le fa’amoemoe autū, ia fa’aleleia atoa ‘auala e fa’afaigofie ai femalaga’ina a le atunu’u.  O le a unaia ai foi le nofoia faasolosolo o nofoaga maualuluga mo le saogalemū.

  • •    Toe fa’atā atoa auala o le Malo i Upolu ma Savai’i (road upgrading programme) ia fuafua lelei ai ma alavai e puipuia ai le toe tafia o le ta e le suavai fetafea’i i luga o le alatele ma faatulaga lelei ai auala savali mo le puipuia o fanau a’oga tagata savavali fa’apea i latou ti’eti’e uila vili vae.
  • •    Fa’aauau polokalame o auala galue fa’atā I Upolu ma Savai’i e aofia ai se auala ta’amilo mo le motu o Manono ma se auala galue fa’ata foi mo Apolima.
  • Uafu:
  • O le fa’amoemoe autū ia lava uafu e āfea e so’o se Va’a Tele i itū aso o le lagilelei ma aso o le loulouā
  • •    Fa’aauau galuega fa’aleleia atili o uafu autū i Matāutu, Mulifanua, Salelologa ma Aleipata mo femalagaina faifaipea ma le tuta ai o va’a la’u’oloa ma va’a la’upasese.
  • •    O le toe polokalameina o le fausia po’o le toe fa’aleleia ma fa’aloloto o isi uafu fa’aopoopo fa’aleoleo mo’omia i Āsau, Palauli, ma Fagaloa mo le fa’aaoga e meli, va’a fagota, ma itūaso e tapunia ai lē tumau uafu autū ona o ni mala fa’ale-natura e poloka ai ālava’a.

FEMALAGAINA I LE SAMI MA LE ‘EA
O le fa’amoemoe autū, ia fa’atumau, ma faaauau femalagaiga a tagata lautele i le sami ma le ‘ea i va’a fa’a-ona-pō nei – i le fou ma le saogalemu e tatau ai.

  • Fa’atumau le tulaga maualuga o le ‘au’aunaga mo femalaga’ina i le va o Upolu ma Savai’i faapea Upolu ma Tutuila ona o lo’o televave pea le tuputupu a’e o atina’e o femalagaina ma atina’e e atili tumutumu ai fa’asoloatoa femalaga’ina i le lumana’i.  Aofia i le fa’amoemoe le fausia o se Malae Va’alele i Aleipata mo nisi malaga pupu’u a Vaalele i le va o Upolu ma Tutuila.
  • Sa’ili alava’a fou i le sami ma le ‘ea mo femalagaina ma le faatupulia atili o tagata asiasi maimoa mai, auā galuega fa’aopoopo mo tatou tagata.
  • Fa’aauau taumafaiga o fai nei mo le maua atili o galuega o tatou alii vaa ua iu mai aoaoga faa-Seila.  Le gata i Kamupani Va’a o le lalolagi, ae ia fa’apea fo’i  i ō tatou lava Va’a femalaga’i  i Samoa.
  • Tatala avanoa mo nisi Kamupani Va’a o le Sami ma Va’alele mo pisinisi ‘ese’ese e fia faia i Samoa. (e.g. a’oga ‘ave va’alele, Kamupani helicopter mo galuega fa’aola etc.)

PUIPUIGA O LE SI’OSI’OMAGA:
O le fa’amoemoe autū, Ia puipuia le siosiomaga i le ‘ea, vaitafe, sami ma le ‘ele’ele mo le soifua taolaola o tagata, laau ma mea ola uma e aogā i le tagata soifua.  O atina’e ‘ese’ese fo’i o lo’o fa’atino nei, e i ai lava so’otaga vāvālalata felavasa’i ma le puipuia o le si’osi’omaga ma fesuia’iga o le Tau, e.g. auala galue, o le toe si’i o Nu’u i nofoaga maualuluga, etc:

  • Fa’aāuau polokalame o taligalu, ma talivai mo alalafaga o lo’o a’afia
  • Fuatia, to la’au, ma le leoleoina o ‘ele’ele fa’asao mo le suāvai taumafa, fa’apea ‘ele’ele fa’asao tu lata i le sami (e.g. Togātogo)
  • Fa’amalosia o polokalame o faasao o figota o le sami, puipuia o manu felelei, ma le tineia o manu ma laau fa’alafuā.
  • Fa’aāuau o polokalame ua lava tapena i masini fa’a-nei-ona-pō mo le lapataia vave ai o le atunu’u i afā, mafui’e ma tsunami tutupu fa’afuase’i ma fa’agaoioia ai loa gaoioiga tatau mo le saogalemu.
  • Fa’aāuāu su’esu’ega faifaipea a le Fale Su’esu’e fa’a-Saienisi (SROS) mo le gaosia o le malosi ‘eletise fa’afouina mai fua o fa’ato’aga (Biofuel) ma isi oloa fou ‘ese’ese.

ATINA’E O AUTALAVOU MA TA’ALOGA:
O le fa’amoemoe autū, ia lagolago malosi ta’aloga mo le atina’e o taleni ta’alo o fanau ua lē agava’a i seisi lava matatā:

  • Ia toe fuafua atoa se polokalame o Ta’aloga ae maise ta’aloga  e ‘ausia ai e Samoa matāti’a fa’apitoa mo pine auro ma ipu o Siāmupini o le lalolagi i Fā’aga Tama Fa’a-va-o-Malō fa’atasi ai ma fesoasoani mo’omia tau tupe e fa’atino ai.
  • Ia fuafua se polokalame e fa’afaigofie ai ona maua fesoasoani tau Faia’oga tomai mai fafo e si’itia vave ai taleni i so’o se taaloga.
  • Fa’aaogā o ‘auala ‘ese’ese e maua ai seleni ia lava mo le ‘auai o ‘Au Si’i i so’o se Tauvaga Fa’a-va-o-Malō e vave si’itia ai le agaga tauva i le ‘auai ma māta’itu taualumaga uma o Tapenaga fa’atino o tauvaga ma le malosi o le tino e tatau ona ausia.
  • Ia ūna’ia ma fa’alauiloa avanoa e fa’aaogā ai fale Ta’alo uma oi Tuana’imato mo Tolegiga, ma Tauvaga fa’a-va o-Malō ma ia lava fa’a’aupegaina fo’i ia fale i masini talafeagai fa’a-onopō nei mo gaoioiga fa’amalositino pito mo’omia.
  • Fa’aāuau le polokalame o fesoasoani mo le fausia po’o le fa’aleleia atili o malae ta’alo o lo’o i ai nei.

ATINA’E O TAGATA ASIASI MAIMOA MAI I SAMOA:
O le Fa’amoemoe autū, ia faia ni gaoioiga ‘ese’ese e atili fa’atupu ai le agaga fiafia o latou e fia asiasi maimoa mai i Samoa ona o tala’ave ua ‘a’ave atu i le matagofie o mea ia e patino tonu i ai lo latou fo’i fia iloa, mata’itū, tofotofo, ma fa’ata’ita’i e ‘auai ma ola ai, ae tele ai galuega mo tatou tagata.

  • Fa’atino polokalame fa’amatagofie, ma fa’a’aulelei  ‘a’ai ma faoā’a’ai, le si’osi’omaga mamā ma lanu lau’ava, o matāfaga, ‘auala, ma ālavai teuteu fa’amamā ma lē otaota, o pa ma’a, togāla’au felanulanua’i, fa’aaliga faifaipea o itūaiga la’ei e fou i le silasila ma isi faiva alofilima, ma le fa’amatagofie o atufālega tu ‘auala, ma le teuteu faifaipea o pa lā’au, pa ma’a, pa simā pa uaea ma pa u’amea e tapena mamao ai mo le samiina o le 50 Tausaga o le Tuto’atasi i le 2012.
  • Fa’atumau ma fa’aolaola le una’ia malosi o le Taulaga o Apia e ‘avea ma tō’aiga tumau o Fonotaga tetele fa’a-va o-Malō i le Maota Fono Fou o le Malō o le a fa’atotogaina mo le ‘au fa’aliliu gagana ma e fa’asalalau ma fa’alupelupe ai loa Apia o le Laumua o Fonotaga ma Ta’aloga Fa’a-va o –Malō i lenei Itulagi o le Pasefika.
  • Una’ia o se polokalame mo alalafaga i tua e fa’atāua ai talatu’u o le vavau fa’apitoa i le Nu’u, Tu ma aga i fanua a le nu’u, Tausamiga o Taumafa na seleele i ‘ele’ele e lē o fa’aaogā ai vaila’au fagavao, Ta’elega i vaitafe ma le sami mamā’, fa’ase’ega i galu fafati ma le aloalo paopao ‘ae maua ai Seleni a le Nu’u.
  • Fausia faaauau o potu lelei faaopoopo talimalo i Afioaga I tua e lagolago ai taumafaiga o fai nei o le faalauiloa atili o Samoa i atunu’u o loo tupu pea Turisi asiasi maimoa mai i Samoa.

 

ATINA’E O TINĀ MA TAMA’ITA’I MA AGA FESO’OTA’I:
O le fa’amoemoe autū, ia fa’amalosia polokalame o matāfaioi tau’ave a tinā ma tama’ita’i i le teuteu mamā o le Si’osi’omaga o le Aiga ma le Nu’u ma fa’atumau atili ai lo latou sao tāua o le Pae ma le Auli.

  • Fa’aāuāu polokalame a Komiti o Tinā/Tumamā auā o latou faiva alofilima masani o le su’isu’i ma le kukaina o Taumafa etc.etc.
  • Fa’aāuāu polokalame o le toe fuataina o le lalagaina o le Ie O le Malō ma le mamanuina o le Siapo ia fa’a’aulelei atili ai nei mea Sina a Samoa auā fa’alavelave fai o Aiga.
  • Fa’aāuāu polokalame o le Fa’amāmā avega mo fa’alavelave fai o Aiga.
  • Fa’atino togālā’au ‘aina, ma isi lā’au totō ‘ese’ese e lagolago ia latou galuega atia’e.

 

O ISI FUAFUAGA TĀUA

  • Toe Iloilo toto’a vaega uma o Fa’amasinoga o Fanua ma Suafa e sa’ili fofō ai i mafatiaga o feagai pea ma Aiga i le umi o fa’atali I’uga o latou Apili.  Ua mae’a fausia le Fale Mautu mo Fa’amasinoga.  O le a fa’atāua i le Paea’iga lenei suiga ma fesoasoani mo’omia e fa’atinoina ai le fa’amoemoe.
  • Toe Iloilo toto’a Tulafono o Nu’u e fa’amanino ai le malosi’aga o Nu’u e mafai ai ona tu’uitiitia matā’upu e ave i le Fa’amasinoga o Fanua ma Suafa.
  • Fa’atuina se fa’amasinoga Fa’apitoa e tagofia ai matā’upu māmā e pei o ‘aitalafu laiti (small claims tribunal) e taugofie lea mo le to’atele o tatou tagata e lē gafatia le tapā o se loia, o se faiga o loo fai foi I isi atunu’u.
  • Fa’atuina o se itutino fou o le Malō e gafa ma le fa’agaoioia o ‘auala talafeagai ‘ese’ese e fa’afaigofie ai atili i le Au Gaosi Oloa le ‘Au faifa’ato’aga, ma le aufaifaiva ona ‘auina atu latou ‘oloa i maketi i fafo.O loo matau lava ma le toto’a le tele o maketi o lo’o i ai mo le ānoāno o oloa tau fa’ato’aga (e.g. talo, fa’i, nonu, vaitu’ufagu, ae o le fa’afitauli ogaoga o le lē lava lea o oloa e fa’amalieina aiaiga uma o maketi i fafo.
  • Fa’aāuāu o le ‘auina atu i galuega fa’avaitaimi i Fa’ato’aga i Niu Sila o tatou tagata ma fa’atalanoa ai le tatala fo’i o le avanoa mo tatou tagata o i ai tomai ‘ese’ese fa’apitoa e sa’ili galuega ai fo’i i Kamupani i Niu Sila ma fa’alautele ai ma o latou tomai.
  • E faaāuāu pea ona iloilo si’itaga talafeagai o penisione i lenei fo’i Paeaiga pei ona masani ai i le fa’autautaga tatau ma gafatia I le tulaga tau Tupe o I ai le Malō

FA’ATUPEINA O LE ANAVATAU

E fa’apei ona tā’ua muamua o fuafuaga ua otooto atu I lenei Anavatau, ua na o ni nai Vaega itiiti o mau atina’e ese’ese o lo’o fa’atinoina nei ma faaāuāu pea.  A tolaulau uma ma auiliili ia atina’e ‘ese’ese o lo’o fa’agasolo nei, e lē uma i se aso e tasi ona laulau galuega o lo’o fa’atino e Matagaluega ma Fa’alapotopotoga ‘ese’ese a le  Malō.  E ao ona silafia, o le fa’atinoga o tatou fuafuaga mamao, e fa’atupe mai I Vaega Tupe nei e 3:

Muamua -     o tatou ala Tupe maua masani mai Tiute ma lafoga a
tatou tagata ma pisinisi.
Lua -      O foa’i mai Malō agalelei
Tolu -      O Nogātupe mai Fale Tupe Tetele o le lalolagi ma isi Fale Tupe na fa’atu fa’apitoa e auala ai fesoasoani i atunu’u tau atia’e e pei o Samoa i Nogātupe e māmā Tului ma fa’au’umi taimi e toe totogi ai, ina ia amata totogi  ane ae ua leva ona uma ma toe aogā le atina’e e fai sona sao tele i le toe togitogina o le Nogatupe.

I le Tala o le Tupe Autū a le Malō i le Tausaga lenei, e mae’a iā Iuni 2011, o le ata lea o tatou Tupe o lo’o fa’agaoioi ai le Malō.

(a)         Tatou lava tupe mai Tiute ma lafoga               -  $472,000,000
(e)          Foa’i mai Pa’aga a le Malō                               -   $124,000,000
(i)          Tupe mai Nogātupe e māmā tului                    -   $149,000,000
$745,000,000

Na o le $472 miliona tupe o lo’o tatou maua mai iā tatou lava tupe masani.  Ae $273,miliona o lo’o maua mai tatou Pa’aga ma Fale Tupe o le lalolagi.  O le fa’avae autu o nei Vaega Tupe mai fafo o loo tutumau I le itu taua lenei.  E aumai le latou fesoasoani I atunuu o loo taulamua foi latou e fai le fesoasoani mo latou lava.  Lea na aliae ina ua fafati le Sunami.  E o’o mai fesoasoani, ua leva ona amata tatou.  O uiga taua ia e faamasino ai tatou e o tatou pa’aga.  Latou te iloa ai, tatou te iloa fai mea.   Tatou te iloa fausia fuafuaga e aloā’ia ma Talitonuina le sao aogā mo tatou lava tagata.

Na o tatou lava alā-tupe e o’o i ai le tatou pule.  A o foa’i mai Malō ma Nogātupe mai Faletupe Tetele nei o le lalolagi, tatou te lē pule ai.  E fa’alagolago le tatala mai i mea tāua nei e lua – Muamua: o le latou talitonuina o ē o ta’ita’ia se Malō.  Lua: – Latou te talitonuina fo’i le tāua o polokalame e mafua ai le nogātupe.   E pei lava fo’i o lota alu i se Faletupe e fai se nogātupe.  E lauiloa loa so ta lē fa’amaoni, e lē fa’amaimau fua lo latou taimi e talanoa ai.

O se tasi o polokalame iloga o lo’o fa’agasolo nei i matāgaluega a le Malō, o le toe fa’atulaga manino lea o matāfaioi ‘ese’ese a tagata faigaluega ina ia malamalama lelei le tagata faigaluega i ona tiute fai.  Ia leai se toe fenumia’i.  O le lelei po’o le fa’alētonu e tula’i mai, e vave ona iloa lē na fa’apogai ma fai ai loa lava le I’uga talafeagai (Good Governance Principles of Transparency and accountability).

Ma o le si’itia o le malamalama i galuega fai i Polokalame o A’oa’oga Tau Galuega o fa’agasolo nei, e lē tauiso le si’itia ai fo’i o le fa’afoe fa’aleleia atili o le fa’atinoga o galuega fai.  E atili si’itia ai tupe maua a le Malō e aoina ma fesoasoani ai i le fa’atupega o le Anavatau lenei.

O le itu i Foai ma Nogatupe, mo atina’e fuafua tatau i le Anavatau lenei, o ituaiga polokalame ia e agava’a gofie mo Fa’aputuga tupe Fa’amatu’u fa’avavevave (Fast Start FUNDS) mo galuega tau le puipuiga ona o Fesuiaiga o le Tau.
Le gata i lea, ae o le talia e le malo Aufa’atasi o le toe tuu atu i tua I le 2014 le Tausaga e faato’a aloaia ai fa’avaomalo le siitia o Samoa e tulaga tutusa ai ma atunu’u ua atia’e o le a lē taumatea le toe maua mai ai pea o nisi fo’i fesoasoani fa’aopoopo a o le’i aulia le 2014.  O lo’o lava fo’i le malosi o le tulaga totogi aitalafu o Samoa ona o Nogātupe a Samoa sa nonō mai i Faletupe nei Fa’a-va o-Malō e māmā tu’utu’uga o tupe toe togitogi, umi le taimi malōlō fa’ato’ā amata togitogi ai ina ia totogi ane ae ua leva ona fa’aaogā le atina’e, toe fa’aumi fo’i Tausaga e totogi ai le Nogātupe.

I le aotelega o le fa’atupega o fuafuaga uma ua faata’oto nei e fa’atupe mai i:

(i)    Tatou āla tupe maua masani ua fa’atō’aga ona aoina mai
(ii)    Foa’i mai a tatou pa’aga masani e fa’avae i le talitonuina maumaua’I ua lava tapena fuafuaga e aogā mo tatou tagata ma o lo’o i ai fo’i lo tatou sao i le fa’atupeina
(iii)    Nogātupe māmā āiaiga o le toe totogiina fa’avave i le talitonuina o atina’e ua mo’omia ai le Nogātupe.
(iv)    Fa’aputugā Tupe fa’amatu’u fa’avavevave mo galuega tau le puipuiga i fesuia’iga o le Tau (Fast Start Funds)

O le itu e fa’atāua e 5 tausaga e fa’atino fa’asolosolo ai le polokalame lenei o le Anavatau.  Talosia ia e leai ni fa’alavelave tutupu fa’afuase’i fa’a-le-natura e toe ono fetu’una’i ai fo’i atina’e ua fuafua i le nei Anavatau.

So’o se polokalame fuafua mo le Lumana’i, ia matuā fa’autagia ua na’o ni ta’iala mo le Malō.  Lona uiga, e i ai pea le tofā fetāla’i fetu’utu’una’i.  E mafai ai e le Malō ona fa’atino nisi fo’i atina’e fou fa’aopoopo ua ave i ai le fa’amuamua ae sa le’i mafaufauina i le taimi na fofoa ai le Anavatau.  O le uiga lea o le tatou soifua.  E i ai lava le fa’afuase’i.  Ae a malamalama lava mai le amataga le uiga tonu o fuafuaga tatou te faia, e lē toe i ai fo’i se Te’i.  Aisea?  O tatou na’o na fuafua, ae O le Atua Soifua Na te fa’ataunu’ua.

UPU FA’AI’U

Tatou te lē mafaia se mea pe a aunoa ma le ‘auai o le tatou Matai Sili.  O nei la mau fuafuaga mamao ua fofogaina i le Anavatau, e tasi le fa’alagolagomaga e fa’apei fo’i ona ta’iala ai fuafuaga uma a le HRPP, talu ona tula’i i le foe o le Sā o Samoa.  O le tu’u atu lea i le Atua o le tatou Fa’avae na te fa’asino mai le ala e fa’atino ai.

Tele mau mea tutupu sa ono lamatia ai lo tatou atunu’u i tau loulouā ma afā sa tatou molimauina ai pea le alofa matalasi ma le lē tu’ulafoa’ia o si ō tatou atunu’u e lo tatou matai.

O lo’o avatu manino fo’i  i upu amata o lenei Anavatau le fa’atāua e le Atua o le Ola galue i le fanua e maua ai taumafa.  E anoano fo’i le mau tala fa’a-fa’ata’oto o lo’o fa’amanatu mai ai pea le fe’au tāua lava lenei o lē tele lana lūlū, e tele fo’i lana selesele.

O le agaga maualuga o le Vaega Fa’aupufai lenei ia manuia tagata uma.  Ae tasi le ‘auala e manuia ai, o le tatou galulue fa’atasi lea.  O upu fo’i o le pese, e leai se mea lelei e maua ma le filemū.  Aisea?  E lē ōgatasi ma le Ta’iala na fa’asino mai e le Atua o le Foafoaga.  O se folafolaga la ua faia o le a ta si’i fa’alua ni au tupe maua e aunoa ma le afu, e lē taunu’u ona e le ōgatasi ma le finagalo fa’aalia o le Atua.  O manu sesegi fo’i na e lua o le Vaomatua e lē o iloa tonu le āoa o lo’o talatalafulu ai
O le fa’apogai fo’i lea o le loto tetele o sui Tauvā o lenei Vaega Fa’a-Upufai e Puipuia Āia Tatau a Tagata e talanoa ai i galuega fai i le fa’ato’aga, po’o seisi lava taleni ma le Tomai o lo’o galue ai.  O mea anoa ia e tua i ai le soifua o aso uma.  O mea e malamalama gofie auā o lea lava na tatou soifua mai ai, o lo’o tatou ola ai, ma ua tatou masani ai.

E ao ai ona tatou matuā li’oli’o i ai latou ua masani i le fai o folafolaga fa’atautala ae lē taunu’u.  Silasila i foliga ma ō latou tala fa’asolopito ma o latou va’ava’a.  O inā e iloa gofie ai le moni po’o le lē fa’amaoni o mau.  A lape ai le fa’autaga, e 5 tausaga e ‘o’ono ai mo le Toe fa’asa’oina.

Fai  loa ma le Toto’a lau fa’amasinoga.  Ma ia manatua, o lau palota e tasi e fa’atonutonu ai le folauga a Samoa i le 5 tausaga o lo’o lumana’i nei e manuia ai po’o le matuā malaia ai o ‘oe ma lau fanau.

PALOTA NEI LOA MO LE HRPP

 

Author: HRPP
Print PDF

HRPP © 2011 - 2016. All rights reserved.